航空公司
因為近日油價上漲，間間航空公司都要加收燃油附加費，部份更收取過百元，所以選定機票價格最平、超早機去晚機返又唔駛收取燃油附加費既日本亞細亞航空。
小評
座位都幾舒服，去回程架機都唔 FULL，空姐都幾好笑容，不過成日掛住自己傾計，飛機餐不過不失，所以之前係 Burger King 食左個早餐先上機 ^^

機票封面	手寫機票

酒店
因為我地想試下北投溫泉，所以就選擇左全北投最出名既春天酒店，雖然要 $985 一晚，但係都絕對值得既！至於其餘三晚，就選擇左台灣新聞組版友一致推崇，又平又乾淨又就腳既東龍大飯店。
小評
春天酒店：溫泉好舒服，張床同冷氣都夠大，好好訓。 zzzZZZ
東龍大飯店：酒店整整齊齊乾乾淨淨，三星黎講算係唔錯，唯一唔好就係隔音比較差，夜晚成日聽到有人係走廊講野（廣東話同國語都有）>o<

旅行社
因為我地要去五天，所以唔可以亦都唔打算買團票，雖然平少少，但係驚唔夠人成唔到團就麻煩，經過一輪格價，我地選擇左星晨旅遊，因為我地買左本 "下一站台北 2004" 入面有兩張 $50 自助遊折扣優惠券，而且用東亞信用咭重有六個月免息分期，正呀 :P
小評
我地係尖沙咀分行報名，個 Agent 即時幫我地 Confirm 左機位，之後因為我張東亞信用咭個分期額好細，需要時間等 Card Center 加大個額，佢知我地要做免息分期，就淨係收左我地 $600 訂金(原本每人要比 $1000 訂金），酒店就要等第二日先可以 Confirm，點知台灣果面打風，最後等左三日先 Confirm 到酒店，不過佢做野都幾有交帶，佢自動打黎講返比我聽個情況，而佢一 Confirm 到酒店就打比我地叫我地去攪埋個分期，之後第二日就可以機票同酒店入住紙，總共需時五日。

旅遊保險
因為係星晨旅遊買旅遊套票，見佢個藍十字保險有八折，所以幫襯埋。
小評
其實都算幾平，而且保障都幾全面，不過有一點值得留意，就係佢個 "旅程取消" 係唔包括因為目的地天氣惡劣不能成行而取消旅程不能取回的的機票及酒店費用。（其他保險公司係有既，如恒生及蘇黎世）

換台幣
好多旅遊書都叫人地去到台灣機場先好換錢，因為會比香港高，但係經版友介紹，係中環有一間找換店，匯價幾好之餘重免手續費，不過如果唔就腳就唔好去啦，唔係可能慳埋都唔夠比車錢。

百年找換店
香港中環德輔道中 61 – 65 號華人銀行大廈 1203 室 (中環地鐵站C出口)
25232549 / 25233403 / 25250474

索取台灣觀光資料
如果去開換錢，重可以去埋台灣觀光協會，佢就位於海港政府大樓對面，攞完特區護照過去就岩岩好啦 ^^ 上面有好多最新既台灣旅遊書供人免費閱讀，又有大量小冊子可以索取，重有專人比你提問。

台灣觀光協會
地址：香港德輔道中173號榮山大廈904室 (上環地鐵站E3出口，先施百貨樓上既商業大廈)
電話：852-2581 0933
辦公時間：星期一至五 09:00至12:30，13:30至17:00

天氣預測
宜家科技先進，帶來了人類既方便，亦為我地出發前一個星期帶黎左憂慮，因為根據天氣預測，一個中度颱風桑達將會係 7/9 正面吹襲台北，所以我每日就不斷係度睇個颱風路徑圖，睇到發夢都見到個圖 >o<
小評
天氣變幻莫測，即使係美軍果個聯合颱風警報中心，日日幅圖都唔同，真係比佢玩死。雖然個風打唔成，但係正所謂”打風不成三日雨”，而我地就落足五日咁多，好似話某 D 地方重大水浸，好彩我地無遇到 :)