2004-09-10
東龍大飯店 → 中正紀念堂 → 鼎泰豐 → 冰館 → 維格烘焙專門店 → NOVA → 書店街 → 港記 → 東龍大飯店 → 青葉 → 黑橋牌食品 → 紅樓 → 西門町夜巿 → 東龍大飯店
今日既行程本來打算去動物園，但係因為呢幾日都落雨，再加上尋日既大雨，令我地決定取消呢個行程，所以今日可以訓晏少少。
起身梳洗後，就落左去下面食早餐，個早餐 Area 好細，數埋都好似得六張枱，而且重要同人搭枱，完全茶餐廳 Feel。除左環境，食物都同茶記無乜分別，一大隻蛋一小塊火腿一籃麵包再加一杯勁難飲既橙汁同一杯尚算 OK 既咖啡／奶茶，所以我地只係食左一日酒店早餐咁多 >o<
食完早餐之後，我地就出發啦，第一個景點係中正紀念堂，我地就由西門站搭小南門支線去中正紀念堂站，好快就到啦！
到達中正紀念堂，我地就周圍影相，跟住入內參觀，比起國父紀念館，呢度算多少少野睇，重見到香港旅行團（永安）tim，我見佢地堆埋一齊，好有耐性咁聽個導遊介紹 D 陳列品，這可能就是參加旅行團的好處？（如果叫我企定定聽故仔，一定悶死 :P）。
參觀完中正紀念堂之後，我地就前往永康街，呢度係一條食街，有好多野食，我地就搵左鼎泰豐同冰館黎試。鼎泰豐係人都識，呢間係本店，係東區都有另一間分店，聽人講會少人 D，但係只要時間早，總店都唔駛等位喎 :) 食完鼎泰豐就向前行搵冰館啦，話說我地想食芒果士多啤梨冰（因為 DD 唔食芒果），咁我地就叫左 6 號既”超級芒果配草莓冰淇淋牛奶冰”，點知原來係同”超級芒果牛奶冰”一樣，只係舊雪糕轉左做草莓味，我就緊係唔要啦，好彩我地未比錢所以佢就肯幫我地轉返”綜合水果牛奶冰”（不過無左奇異果，DD 話知道要哂三隻味喎）。
店名：鼎泰豐
地址：大安區信義路二段194號
|
|
|
ＰＰ評分：3.5
ＤＤ評分：4.0
平均評分：3.75 |
店名：冰館
地址：大安區永康街12巷4號
|
|
|
ＰＰ評分：5.0
ＤＤ評分：4.5
平均評分：4.75 |
食完之後，我地就行返去中正紀念堂諗住搭捷運走人，點知去到中正紀念堂又落起傾盤大雨，我地唯有入去避一避雨，重見到有士兵係度操兵，哈哈，DD 又跟住佢地操，我就緊係拍低呢個歷史性既一刻啦 ^O^ 但係 DD 話段片唔比出街，唯有睇下士兵步操啦 :P
等左一陣，見 D 雨落極都唔停，所以最後都唔理咁多，照行返去捷運站，結果就成條褲加埋鞋襪都濕透 >o<
之後我地就搭捷運去圓山站，目的地係維格烘焙專門店，因為買 Package 送左兩張 Coupon（其實每張 Coupon 係送一舊鳳梨酥同一舊栗子燒），再加上 DD 之前試過佢地既綠豆糕覺得幾好味，所以就去幫襯下。最後因為 DD 覺得 D 綠豆糕巳經無以前咁好味，所以我地只係買左一盒鳳梨酥、一舊心型芝士蛋糕同埋攞左小禮物就走人啦！
跟住我地就搭捷運返去台北車站，我地去左 NOVA 上網，但係又比本 "下一站台北" 老點啦，佢話係四樓，但係我地一去到四樓，係一間語言學校，係有得上網，不過係比會員用架喎，所以就拿拿臨走人，之後終於比我地搵到係三樓度先有得上網，幾好丫，唔駛錢而且速度又快喎，不過無得坐 :P
上網既時候，DD 搵到一間幾近我地又幾出名既小食攤檔，不過都幾隱閉，位於南陽街（人稱補習街，因為超多補習社），果度有一條橫巷，有好多小食檔，我諗對象應該係學生。買完之後，因為無位食既關係，所以我地就拎左去新光三越地庫既 Food Court 度食啦 ^^
店名：江阿姨
地址：台北巿南陽街（橋大書局附近既巷仔）
|
|
|
ＰＰ評分：4.0
ＤＤ評分：4.5
平均評分：4.25 |
食完之後，就行埋新光三越既超巿，都有唔少既手信店，但係價錢都唔平，所以最後都無買到。
之後，我地就開始行書局街，係街頭首先係義美買左版友話好好味既蜂蜜蛋糕返香港食（又真係唔錯喎，好鬆軟）。
跟住就行左無數咁多間舖頭，睇下有幾多折扣，最後係一間叫大方書局既地方（係一間好殘舊既書店，不過全店八折）買左本蛋糕書，但係果度既人就唔多好囉，話說
本書背面有少少污糟，所以我地就問下佢有冇一本新的，佢話無新的，重話我地香港人好挑（DD 話即係挑剔），我心諗駛唔駛咁串喎，無既我都同你買啦，問一問都咁樣，呢 D 係消費者既權益黎架麻 >o<
買完呢本之後，因為太累而且隻襪濕漉漉好辛苦，本來打算再買一本，但係因為又要行去街尾，所以決定聽朝先再黎買，跟住就沿漢口街一段行返去酒店．
我見係維格無買到綠豆糕，聽版友講話酒店對面間港記既綠豆糕都唔錯，就叫 DD 去試下，佢試完就話呢隻味道就似以前維格咁，所以我地就買左一盒啦！
買完之後就返酒店換衫兼休息，之後就再出發去食晚餐。我地搭捷運由西門站去台北車站就轉淡水線去中山站，出站之後就按地圖尋找 "青葉餐廳" 既位置。青葉係一間食台菜既餐廳，價錢合理，味道都唔錯喎。我地去左台灣咁耐都未食過一餐正經既晚餐，而呢度既地瓜粥都好抵呀，同旅遊書所講係唔同既，佢係以吃到飽（即係香港既任食）形式供應，按人頭計收錢，一窩咁上，食完可以再添！而且又有免費既甜品（大菜糕），用觀光護照既優惠券重送埋生果 tim（不過比我發現左一條頭髮係舊芒果度 >o<）
店名：青葉餐廳
地址：台北市中山北路一段105巷1號
|
|
|
ＰＰ評分：3.0
ＤＤ評分：3.5
平均評分：3.25 |
 |
|
ＰＰ評分：4.0
ＤＤ評分：4.5
平均評分：4.25 |
 |
|
ＰＰ評分：3.5
ＤＤ評分：4.0
平均評分：3.75 |
 |
|
ＰＰ評分：3.0
ＤＤ評分：2.0
平均評分：2.5 |
 |
|
ＰＰ評分：2.0
ＤＤ評分：2.0
平均評分：2.0 |
食完之後，因為太飽啦，所以就係中山站行捷運地下大街去台北車站，唔知係咪夜晚既關係，無乜舖頭開檔，勁冷清，途中經過一個紀念 921 大地震既地方，有個大鐘係度，我地就係度影左張相，希望唔好再發生大地震啦！
行到去台北車站，本來想再行返西門町，但係唔知點行，最後就放棄左，搭返捷運去西門站。出左西門站之後，我地去左紅樓影下夜景相，跟住就係西門町周圍影下夜景。
跟住係酒店下面既黑橋牌食品買手信，原來度小月既肉燥由八月起加價加到 NT$130，比度小月 (NT$120) 還要貴 NT$10，加幅達 30%，店員解釋因為台灣豬肉貴左，但係點解度小月又無加呢？
買完之後就返酒店稍作休息。因為今日係星期五，西門町既夜巿比尋日有更多攤檔開左，所以我地就再戰西門町夜巿。點知... 一落到酒店門口，發現又再次下起傾盤大雨，我地即刻返上房攞遮，跟住就照落街買小食（反正今朝都濕過），好彩 D 攤檔重未收即，買完之後就拎返酒店慢慢食啦 :D~~~
店名：涼圓
地址：西門町夜巿
|
|
|
ＰＰ評分：3.5
ＤＤ評分：3.5
平均評分：3.5
ＰＰ評分：3.0
ＤＤ評分：3.5
平均評分：3.25
ＰＰ評分：3.0
ＤＤ評分：3.0
平均評分：3.0
ＰＰ評分：3.5
ＤＤ評分：3.0
平均評分：3.25
|
店名：碳烤串燒
地址：西門町夜巿
|
|
|
ＰＰ評分：3.5
ＤＤ評分：4.0
平均評分：3.75
ＰＰ評分：3.0
ＤＤ評分：3.5
平均評分：3.25
|
店名：巫記青蛙下蛋
地址：西門町夜巿
|
|
|
ＰＰ評分：3.0
ＤＤ評分：3.0
平均評分：3.0 |
食飽飽，沖埋涼，就訓覺啦！（果晚大雨到連電視都睇唔到，好多衛視台都接收唔到喎！）
|
