2006-02-25
明洞 → 新堂 → 南怡島 → 春川 → 明洞

今日原本諗住八點鐘起身，但係我同 DD 都唔知醒，結果九點鐘先醒，攪到趕頭趕命咁，而且禍不單行，尋日我地叉緊既 DV 電，原來係我地熄燈訓覺開始巳經無叉到 ~o~ 所以決定唔帶 DV... 點知連 DC 既叉電都唔記得帶 >o<

沖洗後，我地就拿拿臨搭地鐵二號線由乙支路入口站 (202) 去新堂站(206)，係 8 號出口出站後，就行到去新堂洞的辣炒年糕一條街，我地去左全條街最出名既馬福林婆婆炒年糕家幫襯，我地入到去無乜食客，而佢地自己都係度食緊早餐，坐低後手指一指就叫左兩人份既辣炒年糕啦！唔駛一陣，食物就送到桌上，煮熱後攪攪下就食得，感覺上有少少似尋晚食既部隊鍋。

店名：馬福林婆婆炒年糕家 (마복림 할머니 떡볶이 집) 地址：首爾市中區新堂 1 洞 300-18 　　서울시 중구 신당 1 동 300-18
DD@新堂辣炒年糕一條街 馬福林婆婆炒年糕家 DD@馬福林婆婆炒年糕家 馬福林婆婆炒年糕家門口 餐牌 加料收費表 佢地自己都係度食緊早餐 凍水 我又玩下先 ^^ DD@馬福林婆婆炒年糕家 Me@馬福林婆婆炒年糕家 兩人份既炒辣年糕套餐 附送既黃蘿蔔 又係 DD 攪攪震既時候啦！ 我又玩下先 ^^     太飽啦！食唔哂呀！
		炒年糕、麵條、餃子、雞蛋 - 8000won (兩人份) ＰＰ評分：4 ＤＤ評分：4 平均評分：4.0

由於趕時間既關係，加上朝早實在食唔落咁多野，所以今次無辦法 Clear 就走人啦。走返去地鐵站搭六號線由新堂站(635) 去東廟前站 (636/127) 再轉一號線去清涼里站 (124)。

由四號出口行出黎就見到清涼里火車站，我地行到火車站就連忙找火車月台，幸好火車時刻表上係有英文既 (NamChuncheon)，行到月台重有時間影相 tim :P

上車後，找到座位後就叫 DD 坐下，隔離果位韓國姐姐有備而戰，帶晒書睇咁，一定唔只搭一個站，我就唯有乖乖地企係度。開車之後，有職員推車仔賣小食同飲品，DD 話口渴，所以就買左一罐 Caffe Latte (1000 won)。全程架車都真係幾逼，好多人都企係度，而且有少少似大陸，好多人都無買座位票但係又坐係度，有人埋黎先即刻起身，其實全程火車由入閘上車落車出閘都無人 Check 飛，我有少少質疑如果係企位，係咪唔駛買飛呢？ (唔怪得之尋日買飛時，座位無哂但係企位重有咁多啦？)

搭左個半鐘，終於抵達加平火車站，有少少似上次去十分既火車站咁，火車駛走後可以隨意係路軌影相 :P

影夠相之後，我地就出左火車站等的士，出發前聽過話韓國人鐘意一齊夾份坐的士，但係又唔覺喎，一對對情侶都係自己坐一架的士。等左一陣，終於輪到我地上車啦，上車後將預先準備好既紙仔比司機睇，十分鐘後就去到南怡島渡船口啦 (3900 won)。

到達渡船口後，我先排隊購票，乜都唔駛講佢就比左兩張成人票我 (5000 won x 2)，好似係 Default 左咁。購票後，我地就去左一間超巿買左支可樂 (1200won)，嘩... 重貴過龍平 ~O~ 之後就係附近影下相，見有船到達就排隊上船啦！

來往南怡島同埋渡船口有兩架船，新既似遊艇舊既似漁船，我地去程就係搭漁船啦 XD 上船後，求其搵個位就坐定定，不過，其實企都係企十分鐘即，話咁快就到啦，真係賺到佢笑.....

南怡島因為冬日戀歌所以一炮而紅，成為東南亞遊客到韓國熱門之選，的而且確南怡島真係好靚，令人覺得好舒服，但係人太多既話就無左果種寧靜，建議好似我地咁，唔行大路，改行近湖邊既小路，少人好多，影相都開心 D。但係就係影得太開心，影左無耐相機就無電，唯有用住 DD 部 Snapshot DC 先，再尋找商店買電池，買左四粒勁量電池，盛惠 2400 won，遊客地方唔算搶錢...

其實黎南怡島可以一嚐其馳名既泡菜飯盒，不過因為我地帶左即食薯蓉黎，所以無幫襯。薯蓉原本諗住滑雪果日做早餐既，不過無食到，所以帶左黎呢度食，我地搵左一個有枱有櫈既地方開餐，帶黎既熱水巳經唔係太熱，但係都 OK 喎 XD

食飽之後，再四處走走，就行返去碼頭，見到有人上緊船，即刻飛奔過去，點知去到巳經客滿，唯有搭下一班，眼見距離火車開出既時間越黎越少，我地就越黎越心急。

今次搭果架係新船，大架好多，所以上客都耐好多 >o< 搵到個近門口既有利位置坐低，不斷看著手錶，到達渡船口後，就連忙到的士站搭的士去加平火車站。

到達火車站後，就購買火車票去南春川站，因為春川站興建新鐵路而關閉。購票後，就行出月台等車，但火車竟然誤點，足足遲左十分鐘先黎 ~o~ 早 D 講丫，等我地唔駛咁趕麻 >o<

由加平火車站去南春川火車站，只係四個站，需時 30 分鐘。

落車後，係火車站出面既觀光中心攞左張地圖，就有人埋黎問我地係咪去春川明洞，不過我地當然無理佢，行去的士站排隊等的士。

上的士後，再次出示自製紙仔，順利抵達春川明洞 (2400 won)。

雖然春川明洞亦係冬日戀歌景點，但係其實無乜野好行，反而街尾既春川中央巿場重有睇頭，我地係中央巿場入面見有間 1000 won 店，韓式筷子連埋匙羹只需 1000 won，所以買左兩對留念。

係中央巿場門口有好多檔水果檔，有大大粒既韓國士多啤梨賣，有平有貴，我地去到其中一檔，見 D 士多啤梨幾靚，問佢幾錢，佢開價 5000 won，我地還價 4000 won，佢初頭唔肯，不斷講 5000 won，重攞哂袋裝住，我地無理佢走人，佢最後好唔願意咁減到 4500 won，成交！但佢口 up up 咁，唔知係咪講緊粗口 ~o~

買完野之後，我地就行去黎春川既重點目的地 － 春川雞排一條街。我地由街尾行去街頭，街尾既舖頭真係勁冷清，但係去到街頭果兩間完全唔同，好彩岩岩有人走唔駛等位 :) 周圍都係韓國人，反而唔多覺有遊客，炒辣雞有幾好味？想知就一定要黎試試 :)

店名：名物雞肋骨 (명물닭갈비) 地址：江原道春川市朝陽洞 50-7 　　강원도 춘천시 조양동 50-7
DD@春川雞排一條街 名物 門口既 Menu DD@名物 餐牌 名物店內環境 名物店內環境 Me@名物 記賬單 鐵板 一黎就倒哂所有材料落去... 又係 DD 出動既時候啦... 又係 DD 出動既時候啦... 又係 DD 出動既時候啦... 我又玩下先... 食飽啦！ 食飽啦！ 等比錢...     老板娘話 Coupon 用唔到...
		烤無骨雞肋 (뼈없는 닭길비) - 17000won (兩人份) ＰＰ評分：5 ＤＤ評分：5 平均評分：5.0

食飽之後，就搭的士去南春川火車站，今次停左好多燈，所以貴過之前果程 (3000 won)。

上車後，找到座位便休息一下，火車亦開動，不過途中有一大班行完山既年長韓國人，係架火車度嘈住哂，好似係度開 P 咁，又飲酒又食水果，火車職員好似都無佢符咁，成車人都好無奈（我諗因為佢地係長輩，所以無人夠膽話佢地)。搭左成兩個鐘先返到清涼里，比預定時間慢左 15 分鐘。

落車後，我地就搭地鐵一號線由清涼里站 (124) 去東大門站 (128/421)，但係搭多左一個站，搭左去鐘路五街站，結果又要搭返轉頭，係東大門站轉四號線去明洞站 (424)。

出站之後，我地就先返酒店休息一下，跟住就同 DD 去明洞汗蒸幕一嘗韓國出名既汗蒸幕，不過呢間係日本遊客既專門店，據 DD 回報，入面差不多全部都係日本人。DD 入左去之後，我就行返酒店休息下，夠鐘就去接 DD，點知因為入面太多人，DD 話等左好耐先有人幫佢按摩，所以我係出面足足等左一個鐘，DD 先做完出黎，不過 DD 話都值得一做 :)

返到酒店都成一點幾，沖涼後就品嚐一下係春川買既士多啤梨，正呀！食飽就訓覺啦... zzzZZZ....