2006-02-24
明洞 → 弘大 → 愛寶樂園 → 江南 → Lotte Mart → 明洞

今朝七點就起身，因為要去食早餐，話說 DD 係一本旅遊書度見到一間提供麵包自助早餐既餐廳，所以我地就決定去試下啦。

我地搭地鐵二號線由乙支路入口站 (202) 去弘大入口站 (239)，唔好似為要搭 37 個站，其實係搭 6 個站即，所以二十分鐘就到啦！

出左站之後，行左五分鐘度就見到間舖頭，入到去同店員講左聲「Buffet Breakfast」，佢就示意我地坐低啦！當我攞野食既時候，果個姐姐問我野，不過佢講左好多次我都聽唔到佢問乜，之後佢就用英文問我係邊度黎，我答佢係香港黎之後，佢就用國語問我識唔識華語，原來佢之前係用國語問我野 XD 呢度 D 麵包幾好味，不過全部都係無涵既，可以自己加果醬牛油或者火腿咁... 另外重有果汁同埋即沖咖啡。我地食慣酒店既 Buffet，好自然咁攞完一隻碟又一隻碟，原來呢度係要用同一隻碟黎攞野食架，如果大家去食就要留意啦！

店名：Richemont (리치몬드과자점) 地址：首爾市麻浦區東橋洞 162-16 　　　서울시 마포구 동교동 162-16
DD@Richemont Richemont 內 有橙汁、牛奶同埋咖啡 禁煙的餐廳 排隊攞野食 DD@Richemont   DD@Richemont 好好味既麵包
		麵包自助早餐 - 3500won (每位) ＰＰ評分：4 ＤＤ評分：4 平均評分：4.0

食飽飽之後，我地就沿路咁行去弘世大學，諗住係門口影返張「到此一遊」，但係佢個大門口變左個大地盤裝修緊，我地又唔夠時間入去參觀，無奈地影張相就走人，行返去地鐵站啦！

到達地鐵站後，我地就再次搭二號線由弘大入口站 (239) 去江南站(222)，中途唔知做乜野，又慢駛又停左好耐先開車，原本 38 分鐘既車程，足足搭左一個鐘先到。

出閘之後，我地就沿 6 號出口直行，行左五分鐘度就見到 5002 號既巴士站，不過等左成半個鐘先有巴士，幸好上車後剛剛好有位坐 :P 呢架巴士據稱可以 40 分鐘到達 Everland，但係遇上韓國常見既塞車，最後要 60 分鐘先到達。

到達後，我就排隊去買飛，話說我係機場攞左一張平 2000won 既優惠券，但係果張優惠券係講緊舊價錢 30000won 再減 2000won，即係只需 28000won（可惜果張優惠券只係到 28/02/2006），大家都係乖乖去 Everland 既 Website 印返張減 2000won 即 31000won 既 Coupon 啦 XD 無那那慳左 6000won，好鬼開心喎！

入場後，睇下動物，睇下 3D 電影，跟住就到達重點節目－雪橇同埋雪兜，可惜雪兜場無開，我地玩左一次水泡之後，就排隊玩雪橇，排左半個鐘度，就搭吊車上山滑落黎，真係正過水泡好多，果種速度感好鬼正 :P

玩完之後，我地就去左搵野食，最後搵左間韓國餐廳開餐，因為我地都覺得無理由去韓國食漢堡包 :P

食飽之後，我地就排隊去參觀動物園，排左成個鐘，呢度就好似以前長隆夜間動物園咁，有架車帶你進入動物世界，不過呢度 D 動物經常都係你架車隔離出沒，正得多 :)

之後，我地就返去排隊玩多次雪橇，今次快好多，一陣就有得玩啦，當我地玩完想再 Encore 時，可惜佢巳經收檔 ~o~

本來我打算玩過山車，但係周身都痛（滑雪後遺症），所以決定放棄，只好周圍影下相，之後行左去玩摩天輪，因為唔駛排隊 XD

玩過摩天輪，剛巧遇上晚間巡遊，但係當然無迪士尼咁好睇，因為 D 主角全部都唔識既...

之後，我地就去搵定位，坐定定等睇煙花，等到夠鐘都無野睇，幾驚佢取消呀，但係見旁邊既韓國人都係度等，我地就繼續等，最後當然係有得睇啦，絕對值回票價呀！

睇完煙花就立刻以極速走佬，因為知道越遲走就越塞車，好好彩一出去就見到 5002 號巴士，我都未入錢佢就趕住開車啦 XD 不過韓國既例牌塞車真係好難避免，一返到首爾附近就好塞車，最後用左 75 分鐘終於抵達江南。

落車後，我地就尋找一間本地人常去既部隊鍋專門店，呢間連鎖店係韓國有好多間，但係有分食部隊鍋同埋韓國定食，坐定定後就叫左一個兩人份既部隊鍋啦！女仕們請注意，呢間餐廳既廁所係男女共用既，入到去有兩格，男女各一格... 我入到去見到有個韓國女仔係度都呆一呆...

店名：Nolboo Restaurant - 江南城市店 (놀부부대찌개 - 강남씨티점) 地址：首爾市江南區驛三洞 619-26 　　　서울시 강남구 역삼동 619-26
Nolboo DD@Nolboo 點菜單 前菜 Nolboo 部隊鍋 Nolboo 部隊鍋 DD@Nolboo DD 係度攪攪震中 ^^ Clear !!!   食得乾乾淨淨既部隊鍋 臨走可以攞粒薄荷糖食！
		部隊鍋 (놀부부대찌개) - 11000won (二人份) ＰＰ評分：4.5 ＤＤ評分：4.5 平均評分：4.5

食飽飽之後，我地就行返去地鐵站，途中經過有好多小食檔，DD 就話要試下韓國既栗子，所以就買左一包黎試下，韓國既栗子係幫你搣埋殼，唔駛你整污糟隻手，不過就比香港既栗子硬。

之後我地就搭地鐵二號線由江南站 (222) 去舍堂站 (226/433) ，再轉四號線去首爾站 (426)。不過，係韓國轉地鐵係一件痛苦既事，因為下下都好似中環站行去香港站咁遠 >o<

黎首爾站既目的，第一個就係買定聽日既火車票，但係好可惜，去程只係得返一個坐位，唯有買一個坐位一個企位，不過好彩回程仲有坐位 :)

第二個目的就係去掃手信（其實大部份都係自己食），我地去左出名既 Lotte Mart 買野，你可以將佢想像為百佳超級廣場，係度買既貨品，大約係貨品上標價既七至八折（正價通常係便利店賣既價錢）。因為保安理由，大既袋係唔比帶入去既，可以用 100 won 寄存係 Locker（可以退回），我係度咁諗，呢間 Lotte Mart 係正火車站隔離，如果有人想搭火車去另一處而又即日來回既，咪可以免費放 D 行李係度囉？不過，呢度最大既 Locker 只可以容納到一個手提 :P 至於手推車，又係 100won 一次，買完野放返好去有得退返（同機場客運站套戲一樣，我諗緊有冇人會咁做呢？）。韓國積極推行環保，膠袋收 500won 一個，如果想支持環保，可以選擇自備購物袋或者係門口有紙皮同膠紙比你自行包裝。

時間所限，因為 Lotte Mart 收凌晨 12 點，而我地都要趕住搭地鐵返明洞，所以只係行左一層，買左 N 包零食，攞住兩大袋膠袋，就搭四號線由首爾站 (426) 去明洞站 (424)，之後再行返酒店沖涼訓覺啦！