2006-02-23
龍平渡假村 → 蠶室 → 明洞

明明之前無乜點訓過，但係尋晚都係訓唔著，夜晚三點幾重起身望下個滑雪場，見佢好似係度噴緊雪。

朝早 08:00 起身，梳洗後就食早餐，是日早餐為芝士味雪芳蛋糕 :P

食飽後就抬住重重既 Ski 到滑雪場，先到售票處換 Lift Pass，換左兩張 Lift Pass 之後，就周圍搵目標兜售我地多出黎果張 Lift Pass，最後賣左比一個韓國女仔，按正價一半賣比佢（28000 won），佢初頭都有少少懷疑，叫我等佢換左個 Lift Pass 先走，我當然話無問題啦！最後佢當然成功換到，而我地重賺左 4000 won（因為變相來回車票只需 20000 won） :P

之後，我地就開始係雪場既下面練習，玩到咁上下，DD 話不如搭上去玩囉．因為下面越黎越多人，我話咁快呀？不過心諗有 Lift Pass 無理由唔上去，就同 DD 一齊搭上 Yellow 啦！白痴既我重係度話乜韓國人咁大膽既，個 Lift 無野鎖住既？重叫 DD 向後 D 坐，後尾發現原來要自己拉個扶手落黎既 ~o~ 上到 Yellow，我地就開始滑啦，開頭都幾好架，不過一 S 唔到就超快，因為好滑，又唔係好識停，好驚撞到人，所以就自己跌低黎停。但係跌多幾次，就覺得好累好累，再加上頭先係下面都無休息過，所以根本好似無力再滑落去咁，而 DD 就一支箭咁滑到落去，我重係中間未落哂，最後我決定除 Ski 行落去，真係超樣衰呀 ~o~ 跟住 DD 重行上黎陪我落返去，超級感動呀... 而我就不斷嚷著：「我好口渴，我要喝可樂！」

落左山之後，我地就返房執野 Checkout，Checkout 完就寄存行李。

跟住就抬住套 Ski 行去 Tower Condominium 諗住去另一間之前搵到既餐廳，點知間野又未開喎 ~o~

最後只係超巿買左一罐可樂同一罐 Cappuccino，之後就死死地抬返套 Ski 過返去 Dragon Plaza 個 Food Court，真係辛苦過滑雪 >o< DD 就係出面買隻熱狗，我就買左牛肉湯定食，因為累到死，所以覺得特別好味。

食飽再休息一下，就出去影返幾張滑雪相同埋 Video，跟住就鎖埋入 Locker 繼續滑雪。

今次唔敢好似今朝咁唔休息不停地滑，滑左一陣就休息一下，臨上 Yellow 之前都休息一陣，儲定 Power 上去，結果今次果然好好多，起碼可以順利滑落黎，重可以控制到左右，雖然都係 S 唔到，但係都好滿意，本來想去 New Yellow 試，但係見只係得返一個鐘，驚太趕時間，所以放棄左。

之後，我地就去開 Locker 同埋洗 Ski。

跟住就返酒店攞返行李，重係大堂既火爐影左 D 相。

攞住重重既行李同埋 Ski，好不容易行到去 Tower Condominium 諗住打電話比 SnowPark，誰不知在門口見到佢架車，想叫停佢但係佢又睇唔到走左，所以拿拿臨打電話比佢，等了大約五分鐘，佢就駛返返黎，我地還左 Ski 後就即刻上巴士，但發現所有相連的座位巳經坐滿了，我只好嘗試和一位韓國大叔交談，希望他可以坐隔離的座位，但他好像不懂我的意思，不斷說我可以坐下，後來經一位韓國少女用韓文和他說，他才讓出座位給我們，我立刻同佢講「金沙le打」，但他也好像不太高興，我唯有扮睇唔到。跟住就訓覺，由於中途無停休息站，所以搭左兩個半鐘就返到蠶室啦！

落車後，我地就行落地鐵站，竟然比我地發現左升降機，唔駛抬住行李落樓梯！由於蠶室地鐵站係一個地下商場入面，我地搵左一陣先搵到個入口，之後我就用我準備好既 DIY 紙仔比售票員，成功買到車票。可惜，落月台係無升降機既，唯有搬行李落樓梯...

等左一陣就有車啦，重好好彩地有位 tim，由蠶室站 (216) 搭去乙支路入口站 (202) 唔駛轉車，搭左半個鐘度就到啦！落車之後，我地又搵到升降機上去出閘，跟住又搵到另一部升降機上去地面，但係上到去先發現係對面馬路，又過唔返去，只好死死地搭返升降機落去，行過對面再抬行李上樓梯 >o<

行去酒店途中，發現其中一條街有兩間 DD 最愛既 Outback Steakhouse。

行左十分鐘度去到酒店，我就負責 Check-in，DD 就負責影相，幫我 Check-in 的叔叔英文說得不錯喎！

上到房間，嘩一聲，比想像中靚（因為呢間四星比龍平所謂五星靚得多），雖然細但係新淨，第一次見酒店既電視機竟然唔係放係床尾 XD 因為主要對象係日本人，所以有洗屁股既廁所，有得較溫度、水溫、方向、力度同風力，都幾好玩架 XD

影夠相就出發去食晚餐，是日晚餐係食韓牛，無錯，一般旅行團只會去食豬，因為韓牛相對比較貴，而一般韓國餐廳的燒肉都要二人份起，但我在網上找到一間韓國餐廳可以叫一人份的燒肉，所以就決定去試試。這間餐廳名叫「福清」，在明洞一條橫巷內，距離皇家飯店很近，在該日本旅遊網站聲稱有很多本地人幫襯，但我地去到見到差不多全部都是日本遊客。店員起初都以為我地係日本人，用日文交談，最後我地都係用返手指指，但佢都係用日文答我地 XD

店名：福清 (복청) 地址：首爾市中區明洞 2 街 2-9 　　　서울시 중구 명동 2 가 2-9
福清 DD@福清 Me@福清 燒烤用既炭爐 前菜 前菜 前菜 前菜 前菜 前菜 前菜 醬油   蒜頭 辣醬
		烤生排 (생갈비) - 27000won ＰＰ評分：4 ＤＤ評分：4 平均評分：4.0
		烤豬排 (돼지갈비) - 8000won ＰＰ評分：4 ＤＤ評分：3.5 平均評分：3.75
		可樂 - 2000won ＰＰ評分： ＤＤ評分： 平均評分：0.0

食飽之後，係明洞行左一陣，但因為都夜啦，好多舖頭都收左，我地只係一個小檔買左一塊黑糖餅食，之後就返左酒店沖涼訓覺啦！