2006-02-21

今日原本諗住早少少放工返屋企執野，因為九點就要出門口，點知返到屋企樓下，收到旅行社打黎話我地果班機 Delay 到 0200 先起飛，有點兒無奈，攪亂左我原本既計劃，但係都無辦法，係屋企等點都好過係機場等。返到屋企就整 DD 個生日蛋糕，雖然簡單，但最緊要有心即 :P 之後就上網 Mon 住韓國機場個 Website，睇下果面班機幾時飛（因為佢一日唔飛，班機可能會再 Delay），等到佢班機飛左，我先放心落樓買個飯糰食，食完之後就寫埋個 BLOG，跟住就搭地鐵去東涌（最後一次用免費飛搭咁遠啦！），再轉 S1 去機場。

去到機場，DD 巳經係度等緊我啦，之後我地就上去搵返新華個領隊攞返張 E-Ticket （估唔到團票既 E-Ticket 都一定要攞），跟住就去 Check-in 啦，Check-in 果時隨口問地勤姐姐有冇 Voucher 食野，但係佢一時又話因為天氣 Delay 所以無（吹水啦，人地大韓又飛到過黎，擺明就係要等轉機客啦！），一時又話 D 餐廳都收哂啦（大家樂開 24 小時架喎），都唔知邊句真，一句講哂話無咪得囉...

2006-02-22
香港國際機場 → 仁川國際機場 → 蠶室 → 龍平渡假村

Check-in 之後，我地無即時入閘，因為我想等到十二點，送左個蛋糕比 DD 先（因為我有把刀仔係身 XD），食完蛋糕之後，我地就入閘啦，過關之後，我地見有得上網，就係度睇下 Carmen 去北海道 D 相，之後就行去閘口，途中經過見到有架小型飛機係度，我地就走左入去個駕駛艙，好鬼好玩 XD

之後就係閘口呆等，等等等... 等到一點半，終於可以上機啦！

飛機準時兩點起飛，起飛無耐就開始派飛機餐，我就襯呢個時間送第一份生日禮物比 DD，係飛機度拆生日禮物，應該都係第一次卦 :P 食飽之後，大家就開始訓覺，但係對我呢 D 成日都訓唔著既人黎講，係飛機度訓覺又談何容易呢，好不容易終於都落機啦！

到達仁川大約係六點十五分，落機後我地就過關跟住攞行李，之後就係觀光局攞資料同 Coupon，然後就去買巴士票，由於新華送左兩張值 5000 won 既巴士券，一心諗住補錢搭 606 號巴士去蠶室（8000 won 停站較少），點知因為唔同公司，所以唔可以用果張 Coupon，唯有搭 600 號巴士（7500 won 經金浦機場停站比較多），雖然車費係 7500 won，不過原來唔駛補錢，好彩一出到去就有巴士，上車無耐就開車啦！

搭左成兩個鐘先去到蠶室，落車巳經 08:55，早餐都無時間食就拿拿臨行返去 Lotte Mart 前面搭車，果度有好多架去不同滑雪場既車，因為司機唔識英文，所以我就比預先準備好既韓文資料佢睇，佢睇完就叫左個售票員過黎
，因為我之前問酒店，佢同我講話我地個 Hotel Package 只係包一個 Day Lift Pass，所以我地買左一張來回巴士券（24,000 won）同一張來回巴士券連 Day Lift Pass（48,000 won）。

上車之後就即刻開車啦，搭左個半鐘度，司機就停左係橫城休息站，比大家落車休息下，去下廁所買下野食，我地就係超巿買左一支汽水同埋係小食店買左一包甜薯波同糯米波，上返車慢慢食 :D

開車之後，再搭左大約一個鐘度就到達龍平啦！

到達龍平之後，我地就去酒店 Check-in，櫃台姐姐同我講話間房重未執，但係可以比鎖匙我地放低 D 野先，與此同時，佢就將房價包左既纜車券同埋其他折扣券比我，我發現原來係包左兩個人既纜車券，咁我咪買多左一個 >o< 不過，精明既我當然再問下佢有冇 Gondola 既折扣券，佢打左個電話之後就比左我，好好人喎！上到房間，七國咁亂，哈哈，我地放低行李就出去食飯啦！

原本諗住去一間叫「薯仔專門店」食，但係又搵唔到喎，所以放棄左索性唔食住，周圍行下先... 首先參觀 카페 처음 (Cafe Cheo-Um)，即係第一次咖啡店，入面有好多關於冬日戀歌既野，重有好多影迷寫既心意咭。

參觀完之後，周圍再影下相，就返房啦，終於都執好啦... hea 返陣先 XD

之後，我地就出發上山頂啦，我去買 Gondola 飛，發現原價每位 13000won，用左 Coupon 之後，兩張都只係 12000 won，超抵呀！

龍平呢架登山纜車真係超定，定過海水公園果 D N 倍，搭到咁上下，又係送禮物時候啦，係纜車度拆生日禮物，應該都係第一次卦 :P

到達 Dragon Peak 之後，我地去左 Starbucks 買左杯 Iced Mocha，坐係度一度睇雪景，一度喝咖啡，幾咁寫意呀 XD

係度睇雪景既時候，我地見到有對韓國年青情侶，個女既唔小心將一條 Ski 飛左落個斜坡，個男既真係爬落去執，幾鬼摶呀，個女既淨係企係度望住佢，佢好辛苦終於執返上黎，個女既都好似無乜反應咁，唔通韓國 D 女人真係咁野蠻既？

飲完之後，我地就去左 Peak Restaurant 運吉（即係唔食野又入去影下相），但係運吉都要睇時間，十二點到二點半係嚴禁運吉既，餐廳入面最馳名唔係野食，而係個火爐，都係因為「冬日戀歌」既關係啦！

運完吉，我地就行左出去出面繼續影相，因為呢度係山頂，所以比山下面凍好多，不過我地都唔理咁多，記得睇戲見過話韓國人會將 D 石頭疊起黎許願，放得越高越好，我地就緊係入鄉隨俗試下啦 ^^

之後，我地見呢度有好多雪，就係呢度玩雪啦.... XD

玩完雪，過左去影埋俊尚同維珍既紙板人，點知有韓國電視台既人係度拍緊野，我地叫佢幫我地影張合照，但係佢就用佢部 Cam 影左我地好耐先幫我地影相，哈哈，或者我地果日巳經上左韓國既電視 XD

影完相，我地就搭返纜車落山，跟住就返房放低 D 野。

之後，我地就去 Tower Condo 果度打電話比租 Ski 既 Snow Park，呢間野係網友介紹既，果然真係好掂，大約十分鐘度，佢就上到黎車我地去佢間舖，沿途用佢有限既英文嘗試同我地溝通，但係一講到一 D 比較長既英文，佢就好似唔明我地講乜，只係係度笑。話咁快就去到佢間舖啦，入到去我地就試鞋，我係佢個 website 度 Download 左張 Coupon，不過佢話係上年既，不過唔緊要，佢照比返五五折我地，我地都有嘗試用本手指指同佢溝通，佢見到好似好新奇咁... 試好鞋之後，我就同佢講話會係隔離食野，問佢係邊度搭返龍平架 Shuttle，佢初頭講左係附近，跟住就話叫我地食完返黎搵返佢，佢車返我地上去，超好人呀！

店名：Snow Park (스노우파크) 地址：江原道平昌郡道岩面横溪 9 里 (滑雪場入口) 　　　강원도 평창군 도암면 횡계 9 리 (스키장입구) 電話：033-336-5431 備註：車牌號碼 6692，係 Tower Condo 1 樓自動門前等

跟住我地就過黎隔離一間好出名既黃太魚料理度食晚餐，乜野係黃太魚呢？黃太魚是指在多雪多風的山嶽地區曬乾的明太魚。在長達4個月的期間內,經過了無數次白天融化、夜晚冰凍的收縮過程，因此較之海邊乾燥的明太魚肉質更柔軟、更美味。呢間餐館係本地人既餐館，好少遊客幫襯，不過好彩入面有中國既留學生係度做侍應，可以用國語同佢溝通，不過我最唔明佢點解走去韓國讀英文呢？

店名：黃苔會館 (황태회관) 地址：江原道平昌郡道岩面横溪 9 里 (滑雪場入口) 　　　강원도 평창군 도암면 횡계 9 리 (스키장입구)
黃太魚會館 DD@黃太魚會館 Me@黃太魚會館 牆上的餐牌 Me@黃太魚會館 DD@黃太魚會館 好多野食呀！ 食到好飽呀！ 菜單
		燒黃太魚 (황태 구이) - 8000won ＰＰ評分：4 ＤＤ評分：4 平均評分：4.0
		燒墨魚 (오징어 불고기) - 14000won (2人份) ＰＰ評分：3.5 ＤＤ評分：4.5 平均評分：4.0
		黃太魚湯 (황태 국) - 5000won ＰＰ評分：4 ＤＤ評分：4 平均評分：4.0

食飽飽之後，我地過返去 Snow Park，問下佢聽日係邊度等，因為我地只係租左聽日既早上同下午，點知佢話宜家比埋我地，跟住就車返我地上龍平啦！不過我就諗，佢連我既個人資料都無抄低，又無收我 Deposit，唔驚我攞左佢套 Ski 返香港架？不過證明佢地真係好信得過人。

返到龍平，我地將 D Ski 搬返入房，係房度試著又影下相，跟住就落去滑雪場練習左一陣。

玩左一個鐘度，我地就返房放低套 Ski，之後就去左超級巿場買野啦！

買完野返房放低，我地就落去影下龍平既夜景，之後就返房沖涼訓覺啦... zzzZZZ....