廣州兩天婚慶用品瘋狂購物攻略

今次遊記與以往不同，因為今次以實用為主，亦都係我地去咁多次旅行，影得最少相既一次，因為熱到唔想影相。

首先，大家睇睇地圖先... [按圖可以放大]

好，Let's Start... 一般黎講可以由百利開始行，由廣州東站搭地鐵到市二宮站，有地下通道直接百利，搵唔到可以用 D 出口，過馬路就到天一酒店（如果要過夜可以考慮呢間，約三百蚊一晚），再過多一條馬路就到百利。

百利婚慶廣場係最好行兼最夠冷氣既一個商場，但係可能舖租貴，所以呢度既野亦比較貴... 係呢度既收獲只有：

海博攝影器材商行 (百利 3 樓 D27 號) - 廣東話
5" x 7" 水晶相簿兩本 - ￥8／本 （開價 ￥8.5／本）

跟住就開始行婚紗街，一度行亦都有留意橫巷，無意中見到曾經有人提過既海珠電器城，其實入面好多婚紗店，但係入面環境惡劣，商場無冷氣，間間舖都係開風扇，又熱又焗，即使我們睇見一件婚紗，開價都只係 ￥380，亦都無心情試，走人...

行返出大街，呢條街你睇得上眼既婚紗都過千，因為舖租超貴，所以呢度買野平極有限... 唯一就係係旺角樓梯檔既 60 蚊婚紗鞋同埋褂鞋，呢度成條街統一賣 ￥39，即使我地買兩對都無價講，所以建議大家搵間坐得舒服既鞋舖買就得，而我地就係呢間買：

銀海鞋業 (江南大道北) - 廣東話
婚紗鞋 - ￥39／對

褂鞋 - ￥39／對

跟住就可以過天橋去海珠婚紗城，呢度既舖頭售價合理，我地係度既收獲亦都好豐富，包括有：

廣州金潤佳照材批發行 (海珠婚紗城 B15 檔) - 普通話
評語：呢間睇舖個仔幾寸架，企得好硬，不過得佢有 12 吋既 UV 機賣，網友之前買只需 ￥95（後按：原來係時代婚紗廣場近門口的一間，我睇錯以為係海珠婚紗城近門口的一間 ~o~），我死講爛講都只可以 ￥110 >o< 個相框買黎裝新天地果張油畫布... 買完之後，愛琴海老板娘介紹我地去二樓既王斌相框 (海珠婚紗城 2 樓 C23 檔) 買，可惜太遲啦...

12 吋冷裱機 - ￥110／部 （開價 ￥120／部）

6" x 6" 相冊兩本 - ￥8／本

16" x 20" 金邊相框 - ￥17／個

愛琴海影樓器材用品店 (海珠婚紗城 2 樓 C19 檔) - 廣東話
評語：呢間個老板娘好好人架，又主動幫我地 Check 相簿，一見有問題就換過比我地，又會主動減價比我地。同埋佢呢度既相簿大部份都係硬咭黎既，唔似果 D 包銀邊既咁鬼簿... 又教我地兩種雙面膠紙既分別... 總之好好人啦...

UV 冷裱膜 - ￥140／卷

黃油雙面膠 - ￥20／條

8" x 12" 相冊兩本 - ￥33／本（開價 ￥35／本）

5" x 7" 相冊三本 - ￥12／本（開價 ￥13／本）

8" x 12" 相片板五個 - ￥6／個 [想睇製作方法可按此]

5" x 7 " 相片板五個 - ￥3.5／個

尊貴坊婚紗禮服公司 (海珠婚紗城 2 樓 C21 號) - 廣東話
評語：睇舖既 Leena (花花) 都幾好人，條婚紗既訂做價 ￥680，買現成新貨（包改）既就七折即係 ￥480，最後講到 ￥450 就企到好硬，但係我叫佢送埋婚紗袋佢都肯.. 所以成交... 女友試左件新既，Fit 到漏油，唔駛改 tim... 返到香港，睇到法國情懷網頁賣緊一模一樣既婚紗 (A09) 係 $699 :D

泡泡婚紗連頭紗、拱紗、手套、婚紗袋 - ￥450／套 (開價 ￥480／套)

聖利亞婚紗攝影器材 (海珠婚紗城2樓C13檔) - 普通話
呢度都有唔少化妝品賣，不過我地只係買左乾濕粉卜共四個，攞去新天地影相用。

乾濕粉卜四個 - ￥2／個

呢個商場一樓無乜收獲，賣相冊果間又勁串咁... 出左個商場，見到有條樓梯上二樓，我拎住個喼，本來無諗住上去架啦，不過心諗越偏僻既地方越有好野，點知真係比我地係度執到好野呀，超開心！走既時候，發現其實有 Lift 架 >o<，就係海珠酒店二樓，所以下次大家去又攞住個喼，就行入去海珠酒店搭 Lift 啦...

俊瑋影材行 (時代婚紗廣場 2 樓 211 室) - 廣東話
評語：呢度 D 男恤無價講，但係咁平你重想點丫... 係香港最平都要 $98 一件普通男恤呀 ... 百利都賣緊 $39 架... 而且佢又比我試 Size，試完之後又幫我 Pack 返入袋，服務認真一流。

普通男恤 - ￥25／件

花邊男恤 - ￥40／件

勁閃中皇冠 - ￥35／個 (開價￥40／個)

其生婚紗禮服 (時代婚紗廣場 2 樓 220 室) - 廣東話
評語：老板娘阿妙都好好人，不斷問我係咪黎攞貨，我話買黎送比 D 姐妹，佢就讚我地咁好人，哈哈... 佢地自己有工廠生產，所以價錢可以做到咁平，佢果度重有唔少姐妹裙款，都係一百蚊度，如果大家有興趣都可以去睇下架... 你話香港何先生介紹就得架啦...

靚靚米白毛毛披肩六件 - ￥22／件 (開價￥23／件)

行完時代婚紗廣場，就可以行埋另一邊既婚紗街，首先去左係橫街既經緯相冊，佢好似主力賣大相冊，一本 5R 既水晶相冊都賣成 $20，而且內頁重係簿咭，愛琴海既相冊正佢多多聲，所以無收獲。

跟住去左有香港男禮款既金迪斯禮服店，男禮訂做價 $780 全套不連恤衫，即買都係得九折，又無我鐘意既銀灰閃， 個老板娘又勁串咁，所以無講價亦都無幫襯。

良緣喜鋪 (江南大道北 24-5 號) - 廣東話
評語：第一日去幫襯王生睇檔，我地買好多野佢都有減比我地，第二日再去，王太睇檔，一毫子都唔肯減 ~O~

金裝女上頭用品 - ￥30／套 (開價￥35／套)

普通男上頭用品 - ￥10／套 (開價￥15／套)

1.3 米絨面對聯 - ￥10／張 (開價￥13／張)

聘金大利是封及包羅萬有大利是封 - ￥3／個

心型囍字一對 - ￥5／對 (開價￥6／對)

喱士紅傘 - ￥15／把

上頭用拖鞋 - ￥15／對

上頭用拖鞋 - ￥15／對

第一日就可以收工，第二日就主力睇一德路既藝景園啦...

呢度係一個批發廣場，乜野都有得賣，不過無冷氣架，有 D 行街市既感覺，不過你係度買利是封、花炮、回禮禮物就一定最平，不過大前提係你要買得多，佢地先會比個批發價你架！

唔記得舖名 (一德路藝景園 C 區近門口) - 廣東話

厚身心型汽球 - ￥15／100個、汽泵 - ￥5／支

吉祥塑膠制品公司 (一德路藝景園 C 區 29 檔) - 廣東話
評語：檔主開頭都企硬，我地話走先肯減比我地 ^O^ 後尾發現唔夠貨，所以我地要左幾包西式款。

靚靚燙金公仔利是封160個 - ￥2／8 個 (開價 ￥2.5／8 個)

唔記得舖名 (一德路藝景園地下近扶手電梯) - 普通話
評語：佢開價 5 蚊支，我地話買一打叫佢平 D，佢就話 $4.5 支，我地跟住就話 $45 / 12 支，佢就話做唔到，咁我地咪話睇下先啦，最後咪乖乖投降，哈哈 ^O^ 佢呢度有賣大利是封，$2 一個乍，我地無買到，後尾先記得，無奈地係良綠喜舖用 3 蚊買 ...

12吋金色花炮 12 支 - ￥45／12 支 (開價 ￥5／支)

新發文具店 (一德路藝景園 B 區 30 號) - 廣東話

金色及銀色簽名筆共 12 支 - ￥3／支 (開價 ￥3.5／支)

文華精品有限公司 (一德路藝景園 C 區 12 檔) - 廣東話

金色手拉絲帶花兩包 - ￥4／包 (開價 ￥5／包、10 包以上 ￥3／包)

香港林昇布藝精品公司 (一德路藝景園 2 樓 46 檔) - 廣東話

囍字 Cushion 兩個(不包芯) - ￥10／個

呢個商場冷氣充足，如果你想買回禮小禮物，呢度一定滿足到你。我地無打算買，所以空手而回。