2004-03-14
我地今次個 Package 係濠璟酒店+新渡輪，因為貪佢夜航唔駛加錢，可以玩夜少少，話雖如此，據說佢 D 舊船 (即係以前油麻地果 D）拋到七彩 ，所以我都做足功課，Check 清楚 Confirm 我地來回船都係搭新船，佢話自己六十分鐘就到達澳門，重快過 TurboJet 喎... 好.. 出發!
我果朝好早就出到佐敦，Join 埋 DD 之後，就去左買麵包，跟住就走過去中港碼頭啦！我地係搭 1030 果班，船名叫 "新輪捌拾貳"，D 位座都幾舒服架！不過有一度唔好就係朝早好多大陸自由人同埋旅行團搭架，我好後悔無帶口罩，附近有個男人成日咳又吐痰，影響哂我對新渡輪既印象呀 >o<
  
因為遲左開船，都係果 D 自由人既問題，我地大約 1145 度就到達澳門，Oh Macau, We are back ^O^ 過關之後就係碼頭唱錢同埋攞地圖！
  
由於時間尚早，所以我地就搭酒店車去京都酒店對面落，就行去 "板樟堂街" 醫肚先啦！第一站係 "九記冰室"，佢坐落係一條橫巷度既！我地要食既就係自制三球雪糕 ($6.5) 同埋豬扒包 ($6)，豬扒包即叫即制好新鮮！雪糕我地要左朱古力、士多啤梨同埋橙味，不過好似無想像中咁好味喎！吃完就走人，原來對面係積金局，唔知入面係咪有好多錢呢? $o$
    
跟住落黎就係最緊要果樣啦，最係去搵 DD 最愛既六記紅豆餅 ($3)，上次黎佢無開檔，令到 DD 好失望，所以今次一定要食到，如果唔係 DD 話以後唔去澳門!!!!! 好彩，皇天不負有心人 ，有開呀!!!!!!!!!!!!!! 跟住就緊係過埋隔離禮記士多買野飲，我要芒果汁什果 ($16) 而 DD 就要奇異果汁什果 ($16) ，正呀!!!!!
   
食飽飽就行返去沙利文餐廳等返架酒店車去酒店 Check-in，等左十分鐘就到。國家領導人江澤民黎澳門都係住呢間酒店架，重提埋筆留埋言 tim！但係一 Check-in，就令到我對呢間酒店大打折扣（見後記）。最後成功攞到間房，Yeah ^^ 真理必勝！間房重有個露台花園！
  
Settle Down 之後，我地就搭返酒店車出去，今次就係葡京附近落車，之後再搭 22 號巴士入去氹仔官也街，首先就去左 "翠衡粉麵小食" 買芝士牛脷包 ($11)，唔... 一般啦，都幾特別既 :P
  
下一站係 "嘉模聖母教堂"，我地途經呢條 "跛腳梯”，個名好得意，唔知係咪因為有人係呢條梯度跌跛腳呢？都係小心 D 行先！
 
行左十分鐘度，終於到達 "嘉模聖母教堂"，係度影返張靚相先！
  
沿住呢條樓梯落去就係 "住宅式博物館" 啦，今日係星期日重係免費入場 tim，抵呀 ^^
  
    
  
因為太多大陸自由人既關係，所以我地好快就睇完，見時間尚早，就坐左係隔離既石級度玩鑽石，呢度環境好舒服，因為無自由人，耳根終於得以寧靜，重有噴水池同太陽睇 ^^
  
  
玩左一陣就走啦，臨走緊係影多張相啦！
 
跟住就行返去官也街食野啦，途經一個公園仔 :D
  
跟住就到逹連 "左麟右李" 都幫襯過既 "誠昌飯店"，食最好味既 "水蟹粥" ($55)，好正呀 ^O^ 回味中... :D~~~
  
之後就搭 33 號巴士去提督馬路出返三盞燈附近，諗住去 "強記" 食 "魷魚炒麵"，但係佢竟然無開!!!!!! 等我地係三盞燈坐左半個鐘等佢開檔 >o<
之後就好失望地行返過 "板樟堂街"，都幾遠，好累喎！途經大三巴，夜晚既大三巴真係無乜人架!!!
 
之後行過一間叫 "杜榮記" 既大排檔買左條即炸既油炸鬼 ($2)，不過油麻地乍喎!!!
去左行程中無諗住去既 "蕃茄屋"，佢好隱閉架，係要行上去一條巷既！入去叫左我地想試既 "香草芝士雞" ($35)，為左無咁核突，所以重叫左個 "馬介休炒飯" ($25) 。個炒飯都幾好味，係用橄欖油炒既，幾香，不過就好似太多油！至於個芝士雞真係好好味，好正呀!!!!!
  
  
食到飽一飽，之後就去 "南灣湖" 睇 "激光及音樂噴泉"，沿途經過 "板樟堂前地"，呢度夜晚都幾靚架，開哂燈咁...
  
行左一陣終於到達，不過好似無乜人既，淨係有 d wet 仔 wet 女係度，等左一陣重以為無左 tim，後尾又有喎，都幾得意既！
   
之後就返酒店訓覺 lu ^^ zzzzzZZZZZ...
2004-03-15
0900 就起身落去食早餐（呢個對 DD 黎講係行程中最緊要既事情之一），都算幾多野食喎！特別係 D 麵包都幾好味喎!!!!! :D~~~
  
  
 
食飽飽之後就返房休息一陣，之後就去左游水啦! 泳池就係 2 樓，即係我地住果層，著住拖鞋過去就得啦，方便到極! 個泳池唔算大，但勝在少人同乾淨，游水重要帶泳帽，不過佢會免費借比你，都算係咁啦! 不過廢事影相啦，驚比人打 ^^ 行過佢個 Gym Room，超細呀，公司果個都大過佢啦（突然間覺得公司果 Gym Room 好勁 tim） :P
游完水就拿拿臨返房沖涼，之後就 Checkout 啦，臨走重比左將 Comment Card 個 Reception，不過我唸佢宜家應該係堆填區 >o<
跟住就出發去 "西望洋山"，途經一個地方，我地見佢咁保安森嚴，我就行埋去問個警察呢度係邊度？原來係 "禮賓府"，之後就問佢要行去 "西望洋山" 要幾耐，佢話要十分鐘... 跟住就好快手咁係門口影張到此一遊相 ^^
隔離有個公園，我地見無人係度玩，我地就入去玩下，順便休息下 ^^
 
玩到咁上下就行上山啦，行呀行...行呀行...，行極都未到既，最後足足行左二十分鐘，終於都到啦!!!!! 呢度可以睇哂南區既風景，都幾靚架!!! 不過就好大風，吹到 DD 個頭亂哂 :P 我地重係度篤個旅遊塔，不過篤極都唔郁既 XD 同埋食蕉叔叔話教堂入面唔比用腳架喎，哈哈，但係下面張相點影？我都唔知呀 ^^
  
    
  
跟住就行返落山過返酒店搭酒店車出去京都酒店對面落（哈哈！用盡佢呀!!!!!） ^^
 
之後就行左去 "葉熾記" 外賣 "豬扒包" ($8) 食，味道都不錯！睇見佢個店名都想笑 :D
  
之後就根據阿峯哥本書既地圖走去 "世記茶水檔" ，佢本書 D 地圖真係... :P 不過都比我地搵到，去到就試佢既炭燒多士 ($3) 同埋奶茶 ($4.5)，呢度 D 奶茶係奶同茶分開上既！不過記住等一陣先沖，如果唔係 D 茶會唔夠濃架，我地就心急左少少，所以... 不過都幾好味既!
  
食左咁多野，都係時候運動下，所以就行路去 "澳門旅遊塔"，用左大約二十分鐘度就到啦！
  
上次黎 "澳門旅遊塔” 淨係去左旋轉餐廳食野，都未去過觀光層睇野，今次又有免費票，所以都要黎下呀!!! 我地首先黎到 58 樓室內觀光層，妳以為呢度淨係睇風景？錯啦，佢外圍有兩段路係用玻璃造架，妳係樓上一度行一度向下望都咪話唔驚，亦都唔係好多人敢做！
   
 
我無理由驚架.... ??? ....???....??? 好... 我就行哂兩條比 DD 睇 ^^
第一條 - 下面係 "黃黃” 大海
驚險度：★★★（大不了表演高台跳水）
 <- Click Here to See the Movie
第二條 - 下面係無乜車既馬路
驚險度：★★★★★（跌落去無事都驚比車撞到啦）
 <- Click Here to See the Movie
行完之後就搭 Lift 上 61 樓戶外觀光層，不過呢度都無野好睇既，係比人玩果 D 好貴加好恐怖既遊戲，所以我地當然無玩啦，亦都唔見有人玩喎!
 
跟住就搭 Lift 返落地面，係周圍影下相啦 :D
  
休息左一陣，就搭 23 號巴士去巴掌圍，之後行去 "議事亭前地" 幫襯 "生利咖啡麵食" 既 "魚片炸" ($12)，因為上次黎佢無開到，所以今次試返！但係個老細態度超串囉，聽到我地淨係叫 "魚片炸"，叫我地諗多陣先，死都唔肯幫我地落單！雖然係幾好食，但係今時今日咁既服務態度係唔得架 >o<
  
食完之後就行返出去板樟堂街，經過 "乾草里" 既 "小上海鍋貼" 用 $1 買左一隻鍋貼，不過油麻地即，因為凍左既 >o<
  
食完之後係隔離發現一間叫 "小泉居" 既舖頭，佢既珍珠綠茶 ($3) 做緊特價，所以賣左杯黎飲，都 OK 喎，三蚊都唔可以有乜要求架啦!!!  
跟住就再去六記買多一次紅豆餅 ($3) 食，DD 鐘意食，緊係要 Encore 啦 ^^
 
食完之後就行去 "大三巴”，沿途比我發現一檔叫 "好味道小食" 既舖頭，一蚊一串魚蛋呀，唔食點得呀 ^^
 
跟住經過傳說中既 "戀愛巷” :)
  
之後就到達大三巴啦，上次無上到去個牌坊度，今次上去行返 ^^
    
  
係大三巴影夠相之後，我地就去左 "榮記豆腐麵店" 食左碗熱豆花 ($3.5)，都唔錯喎，同西灣河果檔豆腐花一樣，入口即溶，正 ^^
 
食完之後，我地就去左 "潘榮記" 買 "金錢餅"，老細很客氣，不斷和我地傾計，佢同我地講佢果 D 係叫 "減蛋餅", 因為唔用蛋白架, 咁 D 蛋白攞黎做乜? 原來係留返黎賣比人地整雙皮奶架! 不單止咁，佢就連材料同用乜野牌子牛油都講比我地聽，可能佢老人家太悶啦，一個人睇鋪頭，佢話自己成八十幾歲架啦，但係我地覺得佢個樣都係似六十幾歲乍，見佢咁好客，所以買左半磅！
 
買完手信，我地就去左板樟堂前地既 "玫瑰堂" 參觀啦，呢個教堂真係幾靚架!
    
跟住就行去 "文化會館" 參觀，又話免費入場，但原來典當果部份要收錢架，哈，我地當然唔入去啦，咪淨係去唔駛錢果 D 囉 ^^
    
 
行完之後，就諗住去手信街行下，係街口見到有檔涼茶鋪，就飲返杯涼茶 ($4)，減低我地既內疚感（因為呢兩日食左太多熱氣野）...
講開呢條手信街，真係好恐佈架，D 人會拉住你叫你試野，你話唔試都逼你試，我地當然唔會就範啦 :P 我地重發現一間懷疑係假既 "鉅記"，好彩成功逃走 ^O^ 最後係真既 "鉅記" 度買左盒 "杏仁餅" ($27) 。
之後就行去新口岸間 "新口岸葡國餐廳" 食葡國菜做晚餐，呢間餐廳係澳門既 DJ 開既，我地叫左 "原煲海鮮飯" ($65) 同 "炸馬介休" ($28)，兩樣都好好味架！佢每枱都會送餐包架，但係我地唔想浪費 Quota 所以無食到！
  
   
食飽之後就行去碼頭，搭返 2030 既新渡輪，不過今次因為落雨，所以都幾大浪呀!!! 不過 DD 訓得好"林"，所以完全 Feel 唔到 ^O^
 
  
經過六十分鐘既航程，我地就返到香港啦，亦都結束我地兩日一夜澳門之旅 ^O^
後記
今次去澳門都係大吃大喝為主，大部份舖頭都有開門，都算好好彩！唯一美中不足就係間酒店，呢間酒店既設備質素係幾好既，但係 Reception 就超唔掂啦！我地 Book 酒店果時 Request 左既野，去到無之餘，重叫我地加錢 Upgrade（一般酒店做法係 Free Upgrade），果位女 Trainee （無錯，係 Trainee，果度好似佢最大咁，因為 Manager 出左去食飯），重要態度超惡劣，直至我要求見 Manager （雖然全部出左去食飯，但係我話我等佢返黎）， 佢先死死地比返間房我，呢 D 人絕對唔適合係服務性行業生存！之後返到香港，Send Email 去 Complain 果位小姐同埋讚賞另一位好幫得手既男服務員，但係 Send 左兩次共四個 Email 都無人覆，算啦，這就是澳門五星級酒店的服務嗎？原來大陸的酒店服務都比佢好 N 倍的...
至於新渡輪，佢既新船真係唔錯，值得一搭，但係記著帶備口罩（特別係搭早船），同埋返黎最遲班船係晚上八點半，不過就超少人超舒服 ^O^
重有，食左咁多間澳門既豬扒飽，最掂都係 "大利來"，因為佢個豬仔飽係最正既 ^^ |
