2003-09-11
由於我咁大個仔都未去過澳門，所以 DD 就決定同我去走一轉。我地係中旅社買左皇都酒店同 TurboJet 既 Package，就開始我地 "過大海" 之旅。
九月十一號係中秋節，我地當然都要返工，所以請左半日假，1230 準時走人，即刻衝去地鐵站搭車去上環港澳碼頭，我地係搭 1315 既船，不過可能呢個時間係非繁忙時間，好似就無乜人搭咁喎 ^O^   
大約 70 分鐘度就到達啦，我地首先係碼頭過關、換錢同埋攞地圖，跟住就步出碼頭搵架酒店車，但係搵極都搵唔到，原來佢巳經開走左 >o< 我地唯有等下一架車，見得閒無野做，就係周圍影下相先 ^^
  
等到 1455 就上車去我地今次住果間酒店啦，Check-in 之後發覺間房個 View 都唔錯喎，有 "少少" 海景架 ^^
  
Settle Down 之後，我地就係酒店沿東望洋街行落去搵 "
禮記冰室"，不過搵極都搵唔到，問人又無人識 >o< 就係呢個時間，無意中又比我地發現到喎 :P 入去坐低一人叫左一個 "雪糕三文治" ($5) 食，佢個樣好似一舊牛油咁，其實好似威化餅夾住三種口味既 Home-made 雪糕，分別係芒果、椰子同朱古力，而最後我就食左一又三份之二舊，點解？因為有 "D" 人唔食芒果同椰子囉! ho.....
  
食完之後，我地就經荷蘭園大馬路、白馬行、板樟堂街去搵「六記」買紅豆餅，點知原來佢重未開業 (據聞佢只係由每年中秋之後開至五月就收爐)，令到 DD 極度失望........
我地唯有收復我地既心情繼續行程，搭
26A 去 ” 黑沙灣 ”，到達之後我地就周圍影相 ^O^ 比喻好大支既汽水、好似好多樹既路同埋呢個黑沙灣，佢 D 沙係黑色既，我地重帶左個樽裝 D 做紀念 tim :P
   
  
  
跟住就搭返 26A 巴士出路環巿區，但係因為唔夠散紙搭巴士，所以係檔串燒檔買左一串串燒雞柳 ($2)，油麻地即，不過為左唱錢無辦法啦。
到達路環巿區之後，第一件事就緊係去 "安德魯" 買葡撻 ($5.5) 食，因為香港興起葡撻都係因為呢間野，而且呢間係正店，緊係要試下啦！而佢亦都唔似梁望峯所講話影相會比人鬧，佢重比我地影岩岩出爐既葡撻呀 ^o^ 我地見有少少口渴就買多杯 "
無冰凍奶茶" ($8)，買完之後，我地就行過去隔離既海邊食，都不知幾寫意呀! 葡撻果然名不虛傳，好好味呀 :D~~~，不過杯奶茶就唔多好飲啦.... >o<
  
    
食完之後，我地就開始搵 "崔元記"，原來佢就係 "安德魯" 對面既一間鐵皮屋入面，我地叫左一碗既 "
雞扒番茄通粉" ($14)，個番茄湯底正係佢地出名之處，好好味呀 :D~~~
  
  
食飽之後就行下 "十月初五馬路"，但係見唔到初哥哥喎，跟住係聖芳濟各教堂影相，之後行返出去搭巴士果時重影左張日落相...
  
    
 
經過一個好得意既郵筒時影既...
之後搭返
26 返葡京，途經澳門機場 (好似好細喎) 同澳門大學 (個樣有少少似浸大喎)。
 
返到出葡京就係出面影返幾張日頭相啦 :D
 
因為觀光塔旁開左個叫 "澳門墟" 既物體 (註：即係好似香港既大笪地)，所以係葡京果度有架免費既穿梭巴士入去觀光塔，我地諗住慳返幾蚊搭呢架車入去，點知等左成半個鐘有多先有車黎 >o<
到達觀光塔之後，我地緊係唔去澳門墟先啦，而係去觀光塔既 60 樓 360 度旋轉餐廳食自助餐 (聰明既我當然係香港巳經打 IDD 黎訂左位啦，不過都無窗口位坐 >o<)，雖然係咁，但係呢度 D 野食都幾好食，DD 最愛係佢呢度既意粉，真係好好味喎！為左應節，佢重有月餅 tim 呀，勁!!!!!
  
  
  
  
  
  
  
食到飽一飽之後，就落返去旅遊塔下面影相同埋哂月光 ^O^
   
   
之後就行過去西灣湖廣場既 "澳門墟" 行下影下相。
  
  
之後就搭 32 號巴士出返葡京，影下夜景，之後就入去玩，玩左 $40 蚊呀！好豪呀 ^O^
  
  
豪完之後就係葡京行路返酒店，行到好累啊... zzzzZZZZZZ....
2003-09-12
一起身就刷牙洗臉，跟住就落去食酒店早餐啦，但係唔係太多選擇，不過 DD 都食得好開心 ^O^
  
 
食飽早餐之後，我地就去 "二龍喉公園" 參觀入面既小型動物園，睇下果隻黑熊「圓圓」，但係佢真係好懶架，淨係躲係個洞度唔出黎 >o< 之後行過隔離睇馬騮，因為有人帶左面包餵佢，所以佢十分活躍 :P
 
  
睇完動物之後，我地就搭纜車 ($5) 上山，再行去東望洋燈塔。 (睇下 DD 隻眼，點解會咁既呢？唔係好高即 ^^)
  
去到 "東望洋燈塔" 之後就不斷影相啦 ^O^
  
  
   
  
  
  
跟住就行返過去纜車站搭纜車落山，今次 DD 就唔驚啦，點解？請留意佢坐既方向 ^^
  
跟住沿高士德大馬路去紅街巿，途經「三盞燈」影左幾張相。
  
去到 ”紅街巿” 附近搵 "咖啡明” 間檔，但係搵到之後原來佢又無開 >o< 所以唯有係紅街巿影返張 "到此一遊”，之後經過間鋪頭買左支豆漿 ($4) 飲。
  
之後沿罅些喇提督大馬路、鏡湖馬路去到大砲台，沿途經過一間戲院，見佢咁得意，所以影左張相。
到達大砲台後，係果度影下相，休息左一陣... 不過真係好哂呀....
 
 
  
跟住就行過隔離既大三巴影相 ^^
  
之後就行返落 "板樟堂街”，但係今日 "六記" 都係無開，再次失望中... 最後係 "鴻運麵家" 買左個雞扒包 ($10) 同埋係 "禮記士多" 買左一杯芒果汁什果 ($16) 同一杯奇異果汁什果 ($16
)
，好大杯好好味呀 ^O^
  
 
跟住就到買手信既環節，我地係 "潘榮記" 買金錢餅 ($28)，而係 "三可餅家" 就買左老婆餅 ($15) 同加蛋餅 ($18)。
  
之後，
沿南灣大馬路往「瑪嘉烈」食葡撻 ($5.5)，其實佢同 "安德魯" 一樣既，據聞呢間老婆開，果間就老公開，但係由於呢間 D 葡撻唔係新鮮出爐，所以我都係覺得路環果間正 D ^O^ 不過佢就可以有個露天茶座比你慢慢坐慢慢嘆 :P
  
原本諗住過隔離
「生利咖啡麵食」食魚片炸，但係無開，唯有下次黎先食啦 :D 之後我地就行路返酒店 Checkout 啦 ^^
Checkout 之後係酒店大堂影左幾張相，後面係間新既 "摩卡角子娛樂坊"，但係我地 Checkout 果日下午先開張，所以無得入去攞錢 $o$ 之後係酒店門口影左兩張單人相，然後再搵左一個路過既澳門人幫我地影張合照，但係好擔心佢同我部相機既安全，因為佢唔知點解要企出馬路影相，但係原來都影唔哂間酒店個名 XD 不過都要唔該佢 :P
  
  
跟住就搭酒店車返落葡京再轉 11 號巴士入氹仔，係官也街買左以下手信：
「晃記」綠茶餅 ($22) 「文記」香芋老婆餅 ($16) 「鉅記」紫菜鳯凰卷
($18)
 
本來想去「翠衡」食芝士牛脷包，但係都係無開，所以就直接去「大利來」，佢係全澳門最出名既猪扒包生產地，但係唔係成日有得食，要等到下午三點到先有得食，其他時間只有豬扒治。我地坐低就係度等，為左唔好淨坐咁核突，所以叫左兩杯凍檸樂 ($8) 飲住先，大約 1450 度，老板娘一聲「排隊啦喂！」，人群由四方八面湧出來，好彩我地坐個位好近排隊位置，我就即刻企左個有利位置，等左一陣，豬仔飽出爐啦，其實呢度之所以出名，係佢個豬仔包好味，反而塊豬扒又無乜特別喎 :D 哈哈，食飽飽走人果時重有好多人排緊隊 :P
  
  
乘搭 28A 巴士返回澳門碼頭，去左新佰八伴行左一陣。
  
之後就搭 1730 既 TurboJet 由澳門返香港啦！
  
用左一個鐘就返到香港啦，亦都結束今次澳門之旅 ^O^
  
後記
今次係我咁大個仔第一次去澳門，好開心呀，因為可以同 DD 去旅行，而且重有好多好好味既野食 :D~~~ 雖然今次去澳門無得試 DD 最愛既紅豆餅，但係下次黎一定可以食返既 ^O^ 下次重要試下搭 "新渡輪"，因為佢夜航唔駛加錢，咁就可以玩夜 D 啦 ^O^
|
